05/01/2003

Ky komunitet gjatë 10 viteve të jetës së tij ka ndihmuar në kurimin falas të fëmijëve shqiptarë në spitalet italiane
Moisiu dekoron komunitetin "San Exhidio"

Komuniteti "San Exhidio" ka festuar dje në Tiranë 10 -vjetorin e fillimit të misionit të tij në Shqipëri. Në sajë të misionit katolik dhe projekteve që ai ka patur më organizatat e tjera joqeveritare është ndërhyrë në infrastrukturën e spitaleve, qendrave shëndetësore si dhe kurimin e dhjetëra fëmijëve shqiptarë në spitalet italiane. Për kontributin e këtij komuniteti në fushën e shërbimit humanitar, presidenti Alfred Moisiu e ka dekoruar këtë komunitet me urdhrin "Nënë Tereza". Në ceremoninë e dhënies së urdhrit mori pjesë kreu i këtij komuniteti, Vinçenso Palia. Urdhri "Nënë Tereza" i është dhënë këtij komuniteti fetar me motivacionin "Për Merita të Veçanta në Arritjen e Kompromisit Politik në Shqipëri". Presidenti Moisiu, ka përshëndetur drejtuesit e komunitetit dhe ka përkrahur rolin pozitiv që kanë pasur misionarët e saj në qetësimin e klimës politike në vend. Ky komunitet ka qenë i pranishëm në Shqipëri në momentet më të vështira të 10 viteve të fundit duke bërë të mundur nënshkrimin e disa marrëveshjeve për qetësimin e situatës. Në veri të vendit një numër i konsiderueshëm familjesh kanë lënë hasmëritë dhe kanë falur gjakun falë ndërhyrjeve që kanë bërë misionarët e komunitetit "San Exhidio". Zona të tilla si Puka dhe Shkodra janë vizituar herë pas here nga përfaqësuesit e këtij komuniteti. Ky komunitet fetar është tepër i njohur në Shqipëri për rolin ndërmjetësues të tij mes politikanëve shqiptarë. Një prej marrëveshjeve ka qenë edhe ajo e vitit 1997, ku pozita dhe opozita ranë dakord që të krijonin një qeveri teknike, për të nxjerrë vendin nga trazirat. Në konferencën e djeshme që u mbajt në mjediset e Pallatit të Kongreseve, përshëndeti zëvendëskryeministri dhe ministri i Jashtëm Ilir Meta, lideri demokrat Sali Berisha, kryepeshkopi Anastas Janullatos si dhe monsinjor Anxhelo Masatra. Një rol pozitiv në misionin 10-vjeçar të këtij komuniteti ka pasur edhe ndihma që ata i kanë dhënë spitalit të pediatrisë në Qendrën Spitalore Universitare. Misioni i parë në fushën e shëndetësisë i komunitetit ka qenë dhënia falas syzeve për 9 mijë persona, prej të cilëve 8 mijë kanë qenë fëmijë. Vetëm në QSU, nga viti ’92 kur është hapur qendra e parë e komunitetit "San Exhidio" deri më sot janë sjellë ndihma për repartin onko-hematologjik, spitalin pediatrik dhe 13 qendra shëndetësore në fshatra të ndryshme të vendit. Një nga projektet më të rëndësishme të këtij komuniteti ka qenë mjekimi i fëmijëve shqiptarë në Itali. Mjekja pediatre Anila Godo, tha se ky komunitet e ka hapur gjithnjë derën sa herë që spitali pediatrik ka pasur raste urgjence. Në spitalet më të kushtueshëm të Italisë janë kuruar 12 fëmijë nga sëmundje të rënda dhe 5 të rritur gjatë këtyre viteve. Ndërkohë që 450 persona të repartit të hematologjisë në spitalin pediatrik kanë marrë medikamente falas falë bujarisë së këtij komuniteti. Drejtuesit e këtij komuniteti theksuan se një pjesë e konsiderueshme e projekteve janë përqëndruar në zonat veriore, si në Lezhë, Shkodër, Burrel, Mirditë dhe Dibër, në ndihmë të fëmijëve që kanë probleme me kequshqyerjen.